Introduction to Economic

其實任何事物，都有一個價。
相信有讀過經濟學既都會明白，銀碼本身係無意義既；價，係用黎簡單地表達"代價"既方法。根本上，只要肯面對現實，你會發現所有野都明碼實價，超級公道，你絕對有得揀。
舉個例，作奸犯科既人其實同人做緊交易，佢地賣命賣人格；婚姻就好似兩個人一齊租個共同生活，大家都要不斷付出，咁有啲人成日欠租唔比錢，或者人地要美金你就側側膊比人民幣，咁個合租人梗揾地方搬啦。
就係咁，每件事都總有個價，有啲收Cash, 有啲要分期支付。
不過價，係相對價格，對唔同人又會有唔同收費。我同你熟既，計你友誼平啲，得閒關心下我就夠；我愛你，咁我對你既忠誠就可以收順啲，比我知你愛我就夠。
而家，我買緊一個奇怪既關係。我覺得佢唔只朋友，但我唔想亦買唔起佢既愛，我只係買最平既優惠套餐，留住一段奇怪關係；佢對我，亦唔止朋友，但唔知係我唔抵佢買去擁有，定係因為佢供緊另一個既原因，佢都只係租住我感情既一角。
或者，大家都只係當比錢買娛樂，唔捨得付出太多，卻怕寂寞。