憤世嫉俗?!我?!

唔知大家仲記唔記得A-level時中文果篇《唐山大地震》?裡面講到其中一個生還者，因為被困於黑暗中兩日先獲救，從此極度害怕黑暗。有一個，因為獲救後第一件事係飲葡萄糖水，自此唔敢食甜味。
唔知大家又有冇聽過一個關於鯊魚既實驗。將一塊大玻璃放喺鯊魚池中間，將後o係玻璃另一邊放啲魚。起初鯊魚會撞向玻璃，但當然佢唔會成功食到啲。經歷過無數次失敗既鯊魚，最後學乖左；甚至收返塊玻璃，佢都唔會再游過去。佢，怕痛，怕再次焦頭爛額，怕受傷害。

我都係一樣。

人都係從其他人或自己既經驗中學習既，我所學到既係感情太飄忽。有人可以好勇敢去愛，我羨慕；有人可以為愛不計代價不惜後果，我佩服。只係我清楚明白我對愛情太細膽懦弱，我做唔到。我需要平穩，我需要可預計既未來。

尋日木哥哥突如其來既一句"你好似好憤世嫉俗咁喎"，真係令我呆左一呆。無錯，我討厭呢個咁現實既世界。如果可以，我想做返一個單純無機心天真開朗既我，生活o係簡單美好既世界。但我知我要去適應現實，我要好好保護我自己，所以我變得比現實更現實。我討厭我而家咁樣，我覺得醜惡。我太害怕受傷害，而呢個世界又有太多去傷害人既人；我唯有扮成一隻刺猬去保護自己，然而呢個我令我心寒。

我依然相信有好人存在，然而我好難去相信一個人係好人；我依然信有人會愛我，然而我唔會相信人既愛會係無條件既愛，亦唔會相信靠住愛，可以一生一世。