都是執着

睇完一個"老"朋友既日記。
我認識佢既時候，大家都仍然對未來充滿好多童話式憧憬；我地一齊傾幾時嫁、講男友是非、行街買衫、許願占卜。可能因為我地都唔太需要為生活煩惱，我地當時只係希望男友生性努力上進，可以賺到$養妻活兒，咁我地就可以享受少奶奶生活，幸福到永遠。
但而家大家都已經唔再同當時既男友一齊，並且亦已再同另一個人相戀，然後分開。
相對於以前，想法真係唔同左好多。一樣既，大概就只有一份執着。以前執着於要一個將自己捧在掌心呵護既男友，結果兩、三日唔見面就比自己既胡思亂想折磨死；情緒化既結果，當然係分手既主因。其後，開始知道麵包既重要，我揾到一個可以供給我愛情與麵包既男人，結果係佢既條件亦吸引到其他女仔；我朋友亦揾到一個條件不俗既他，可惜人大左，要求都唔同，於是自願離開去尋找自己既世界。
記得上次分手，我曾揚言無左"佢"，我會崩潰。我執着於過去既美好回憶，一份金玉其外既感情。我朋友一直忍耐"佢"心底有一個不肯放低既她。佢執着地相信住既，係一個精誠所至既奇蹟。

執着，有時係因當局者迷。
不過執着還執着，總要叫自已儘量清醒。
愛情重要, 但生命無價；
因愛生恨，但恨並唔會使人快樂；
覺得痛苦，但痛苦可能源於不必要既堅持。

海嘯一剎那就奪去咁多人命，難道仍然未夠去提醒人要愛惜生命、愛惜眼前人?
當你痛苦到想輕生，有更多既人已無選擇地離開世界；當你立下誓言與某某不再相見，有更多人喺一瞬間已陰陽相隔。
當你發現痛苦源於執着，你會慢慢學識放開，然後發覺唯一應該執着既，係快樂同幸福。