速食一份愛情

經常聽到有人批抨"速食文化"。食要快，學野都要快，中文打字都用速成。仲話，時下青年好少花時間讀文學作品，然而果啲好煽情嘅愛情小說就大賣。

我就覺得，其實咁又有セ問題?
如果讀文學作品係以學習為目的，咁我唔學文學而去讀財務管理行政管理德文俄文西班牙文得唔得?而家個個都話要增值，放工後都要上堂，難得有時間睇書就當然唔想仲要研究文學。
咁有人會話睇文學作品都可以當作消閒活動。都得嘅，如果你有時間沖定一杯香茶，坐喺梳化仔細閱讀，然後讀到一節.."呀..呢個意境..."然後望窗思考... ...嘩，你可以咁游閒咁睇就當然正啦。但香港有幾多人得先? 學阿田雞話齋 "唔好怪我咁直，我一分鐘幾廿萬上落... ..."

可能我個人比較膚淺，我覺得文學呢樣野係要有返些少人生閱歷先睇得出味道。對於後生仔，有時睇完都唔知佢想點。同埋，有時我睇小說，係想渲洩情緒。
愛情小說當然係要有悲情位先好睇，因為悲傷先最易觸動到人 (與流行音樂多是講失戀苦戀暗戀同一原理)。文學，當然係要講意境，情緒表達比較含蓄。但，大佬呀，我有三份 paper 四份 report 五個 presentation等住我，仲要我諗咩意境、咩咩 "天空中的一片雲"?? 玩我咩?! 反之果啲無咩深度既小說，夠表面夠直接。係呀，係好膚淺，但佢直刺刺咁大大カ咁插到入去心入面傷痛果一處，即刻好身同感受，即刻覺得有人明白自己。無經歷過? no problem，佢講得咁白咁易明。就咁用兩個鐘，你就可以輕輕鬆鬆速食完一份淒美嘅愛情。
其實，真係幾爽。