現實啲點解唔得

教 Nail art 嘅導師有一個香港丈夫，大概廿幾三十歲吧。今日上堂實習時，於閒聊中佢話:"我老公話香港女仔好現實，所以唔鍾意。"意思大概係話香港女仔常常會向$看。

點解男人總係介意呢啲嘢呢? 女人喺選擇伴侣時有考慮對方嘅經濟環境，究竟有咩咁唔應該?我真係唔明。
無錯，愛情係唔應該同金錢物質有關，但結緍並唔係一個"愛"字咁簡單吧? 結緍係講共同生活，實質上唔係一樣浪漫嘅事，柴米油鹽樣樣都係$，愛情唔會令人飲水飽的。貧賤夫妻百事哀，結婚前唔想清楚，結婚後兩公婆可能常要為一千幾百嘅開支嗌交，咁又何苦?

其實男人亦太奇怪吧，好像現實嘅女性會褻瀆咗神聖嘅愛情，但我從來唔覺佢哋嘅愛情有幾咁神聖。女人睇男人嘅經濟能力，就如同男人睇女人嘅外表，大家都有權以自己嘅標準去選擇伴侣，無人比別人清高。

再講，有時男人係爭唔過人，就話女人現實、向$看，唔想認係自己比人差。點解咁講? 試想下而家嘅女仔，多數都受過高等教育，會於社會工作，無論見識、學歷都提高咗。自然地，女性會想揾啲學歷相當嘅，能同佢有心靈上溝通到嘅；有咁上下閱歷，就想伴侣最好能處事待人成熟啲，唔想"凑仔"。咁學歷唔差，處事成熟嘅男人，通常都會職位較高，自然賺到多啲$。
係男人自己睇錯重點，關人咩事?