流星花園

用兩日睇哂十九隻碟。
幾好睇呀。雖然啲劇情有啲位前後矛盾，道具有啲求其，男主角唔靚仔，不過個故事確實滿足得到女仔嘅虛榮心 -- 一個平凡女仔唔使靠學識外表身材手段，輕輕鬆鬆就得到台灣大家族之首嘅繼承人嘅心，未正式拍拖就肯為佢連命都唔要。

同表妹一邊睇，一邊不斷講 "搞錯呀"、"唔係呀嘛"、"離譜囉"... ...因為，個编劇寫到個女主角好似好白痴咁，啲思想行徑實在奇怪。或者係我奇怪啦，我覺得女人戀愛時唔多唔少都會耍啲小手段。又或者咁講，手段，其實係如何進退嘅技巧。愛情根本就係一樣非常需要技巧嘅嘢嘛，唔係一句我愛就可以大哂。

其實，女人心中都有本獨門愛情功夫秘笈，希望有日練成一身好功夫，可以成功生擒到佢啊嘅愛人成家。思想可以好複雜，動機卻其實好單純。