世故

而家先明點解香港嘅小孩子都似老人精，小時候有不該有嘅世故，大咗卻又無主見。因為，我哋由小就被訓練成為睇長輩"眉頭眼額"嘅專家。

加拿大呢邊嘅表弟，自小就喺加拿大成長。佢嘅思想方法好單純，好直接，心果句口果句。來自香港嘅我，對住佢又好氣又好笑，總覺得佢唔夠圓滑，待人接物亦唔夠醒目。終於噚日就"中招"，激死他媽。當時我亦在場，其實佢只係做得唔好，但不至做錯。事情只係佢唔識"尊重"長輩，又"貪心"收下長輩俾嘅錢，結果他媽被人寸佢唔識教仔。

中國人最常罵子女嘅句子之一必有"冇規舉"呢句。
然而通常規舉都係要靠"各自领悟"，唔會明言。闖禍幾次，又觀察吓同輩，自然學得懂。
表弟問佢做錯咩事，我就教佢:

"唔驶明啦。總之，你日後同長輩一齊去應酬，叫人就叫，見茶就飲，見嘢就食；有問就好好答，無事就少出聲；要笑，但唔好"懶funny"；未問長輩，就盡量唔好做決定。做到呢啲，至少保你於90%同長輩出席嘅場合都唔出事。

"好假啫咁，點解要咁啫"，表弟話。

講完果刻，我都覺自己原來好假。原來不覺間我被訓練到假得咁自然，而且假得理所當然。

"慢慢你會明嘅。一來係因對人尊重，二來呢啲係禮貌，係規舉。"，我笑住話。
實情係令大人有面，你先有好日子過嘛表弟，但呢句我只收於心中。

扮慣嘢，改唔到。