第三者

我一向都好唔贊同人去做第三者。
做第三者同做恐怖分子一樣，都係自殺式地破壞。人地段感情本身病病地，無端端被炸死咗就當然惨；但係第三者係咪會開心先?! 咪一樣損手爛腳。咁又何苦呢？損人而不利己。
所以我一直認為，女人應該團結啲，唔好再做呢啲互相殘殺嘅野。

但，同我一樣咁諗嘅好朋友竟然做咗人地第三者。
我唔係怪佢，而係我會明佢其實好辛苦。淨係每晚想住"我男朋友而家同佢女朋友做緊咩呢?"已經夠難頂，仲要分分鐘驚被"發現"。

其實邊個會想自己做第三者。不過啲男人就係咁，話咩"俾啲時間我，我會同佢分手"、"其實我同佢嘅感情好有問題"，咁女人就好易會心軟。
但係佢地嘅感情有問題呢樣野，係個男人自己講嘅，可能唯一嘅問題就係佢身痕想出去玩。唔通果個男人會同你講"我同我女朋友感情幾好o架，我只係貪玩先去識第二個" 咩?
仲有，佢話會分手啫，到時唔分你都奈佢唔何。

我真係希望Honey 你要諗清楚。