爸爸

又到父親節，不過我從來無好好地為父親慶祝過。

之前講過我哋家族嘅成員之間感情好好。但其實當中有一個例外，就係我同我爸爸。

我同我爸爸嘅關係一直都唔好，而呢個"一直"大概始於懂事之先。細細個時爸爸一抱我，我就會即刻喊。

一直到呢家，我哋嘅關係始終未好過。
但其實我知，佢係一個負責任嘅爸爸同丈夫，而且好愛我同媽媽。爸爸好錫我，基本上佢連閙亦唔捨得鬧我，更莫講話打。佢一直努力工作，將最好嘅留俾我同媽媽，一家人從來衣食無缺。佢一有時間就會留俾屋企，幫手做家務，甚至為我學煮飯。

只係，佢只識用佢嘅方法去愛，佢唔識去愛。事業上嘅挫折傷害咗佢自尊，亦令佢唔再相信人。佢太自我中心，又太愛批抨人。佢令身边嘅人好大壓力，好辛苦。
我恨佢點解唔肯去改，我恨佢令我恨一個愛我嘅好爸爸。

其實，喺心裡面我好愛我爸爸，只係我始終無辦法去講一句父親節快樂。