有危有機

是咁的。
連發夢都未有想像到香港會亂成咁。

以前講起政治，尤其英治時代，no！好多人請願講點賺錢。
我自己，亦有好多人嘅心態係：「六四民連？好偉大！除左支持一下平反，唔使再另外搞野嘞，反正大家安居樂業，唔使搞咁多啦。」

但回歸十五年後，
大家竟然有機會以第一身感受當年六四嘅震撼。
為著同樣一個政權，一群同樣熱血嘅學生，選擇義無反顧咁為公義與民主而抗爭。
而原來，到左一個關口，觸動到大眾嘅道德底線，刺激到大眾嘅良知神經，
即使本來對政治幾冷漠嘅，都難免會基於本能流動熱血。

有時，人又或社會真係要置諸死地而後生。
政府未衰得咁緊要，人未逼到絕路、未被踩上心口，
好多人都未識醒。
但被政府咁搞一搞，好，就立即為全香港人上左一堂好好嘅公民教育課。
自己，與及親人朋友，與及其他好多以前一樣好少留意政治嘅人終於覺醒，記起作為一個香港公民，應該多了解社會上發生嘅事，有責任監察政府，有責任出聲反對不公義。

眼見大量良心復蘇，就感覺到雖然前路難行，但香港，依然滿有希望：）
我相信，同學們嘅努力唔會白費，只要堅持，成功在望。